صباحكم .. مساكم عطر

 

اول شيء وقبل كل شيء ابغى اقول لكم نصيحة في السفر :  اختر بدقة مع مين تسافر ، لأن الناس اللي تسافر معك يا إما تنكد عيشتك يا إما تعيشون سوا أجمل الأوقات ومن أهم النقاط اللي لازم تتوفر في الأشخاص اللي معاك ان الاهتمامات اللي رايحين عشانها تكون وحدة ويكون طريقة اختياركم للمواقع والاماكن والاهداف وحدة ..  عموما ما اكثر في الكلام وندخل على هالرحلة بشكل مباشر 

طبعا تلاحظون اني قلت المدن المتضمنة في رحلتنا القاهرة وشرم الشيخ والحقيقة القاهرة كانت مجرد مرور لا غير يعني في تقريرنا ما راح يتناول شيء في القاهرة الا شيء بسيط جدا فمعظم التقرير راح يتناول شرم الشيخ وهي هدفنا من السفرة

___________________

أعضاء الرحلة : أنا حاتم ، سامي أعز اصدقائي ، عبدالرحمن اخوي

طريقة الحجز: طيران عن طريق موقع مصر للطيران ، فنادق عن طريق الحجز الإلكتروني من موقع   ejazti اجازتي

زمن الرحلة : 5 ايام 4 ليالي في شرم الشيخ ، متزامنة في وقت اجازة عيد الأضحى المبارك

 

فريق الرحلة زي ما قلت ثلاثة اشخاص انا ووقتها كنت متواجد من قبل في القاهرة وسامي وكان جاي من الرياض ع القاهرة وعبدالرحمن اخوي وراح يقابلنا في فجر أول ليلة لنا في شرم وجاي من جدة

وصل سامي للقاهرة يوم الخميس 4 ديسمبر واسقبلته في مطار القاهرة وكنت ماخذ شقة في مدينة نصر وانا احب كثير مدينة نصر لانها بعيدة عن وسط المدينة وقريبة من المطار وقريبة من افضل مول في القاهرة سيتي ستارز ، المهم كان وصوله صباح كذا عالساعة 10 وأخذنا الشنط حطيناها بالشقة ورحنا لسيتي ستارز نفطر ونمشى شوي بعدها رجعنا وبعدين رحنا لمول اسمه اوركيد اشترينا فيه اغراض الغطس والسنوركلينق وبعض الأغراض اللي نحتاجها في السفرة واتجهنا بعدها لمقهى السوليدير اللي في المهندسين مقهى رائع سهرنا فيه لين متنتصف الليل وهالكوفي جدا رايق وجلساته حلوة وراقية

يوم الجمعة كملنا رحلة التسوق للأغراض المهمة اللي نحتاجها ورحنا بعد دخلنا سينما ووقتها كان عرض فلم احمد حلمي كده رضا وشوفناه في سينما فندق هيلتون رمسيس وتمشينا شوية عالنيل وبعدها رجعنا عالشقة نجهز شنطنا الخاصة بشرم

 

اليوم الأول : السفر

يوم السبت كانت رحلتنا المغرب وكنت حجزت الطيران من موقع مصر للطيران وكانت قيمة التذكرة الوحدة بألف جنيه يعني تقريبا 660 ريال سعودي ذهاب وعودة أما الفندق فحجزته عن طريق هذا الموقع الرائع ejazti  والحجز يتم الكتروني مباشر وبحثت عن فندق مناسب وكان اختياري لنفدق سافوي سييرا فندق رائع بصراحة خمسة نجوم وحجزنا غرفة لثلاثة أفراد فل بورد يعني اقامة كاملة شاملة كل شيء الوجبات فطور وغداء وعشا والمشروبات اي وقت والوجبات الخفيفة وكان السعر خيالي كان 504 دولار لمدة 4 ليالي يعني الليلة تطلع بس 126 دولار الغرفة طبعا انا كنت قلقان من شيء واحد انه يكون صوت الطيارات مزعج لان الفندق خلف المطار لكن ما كان عندنا خيارات افضل لكن بعد ما وصلنا الحمدلله بصراحة ما نسمع اي صوت للطيارات فكان اختيارنا موفق، عموما نرجع لرحلتنا رحنا المطار وركبنا الطيارة كانت صغيرة جدا ماتسيل ركاب كثير بس مليانه المهم بصراحة الرحلة من الطائرة والمناظر اللي تشوفها روعة جدا خصوصا جبال سيناء ونعدي على فوق الموقع اللي كانت فيه قصة موسى عليه السلام اللي وردت في القرآن وهو فار من فرعون واللي غرق فيها فرعون وهذا حسب كلام الطيار لما وصلنا لها قالنا ..

عموما الرحلة تستغرف ساعة تقريبا ووصلنا لمطار شرم بعد الساعه تقريبا 8 وأخذنا تاكسي طبعا المشكلة التكاسي انه لازم تكاسر معها وانا كنت اعرف انه الاسعار في شرم للتكاسي غالية بحكم انها مدينة صغيرة ومشاويرها قريبة عموما التاكسي طلب 100 جنيه وقلت له لييييييييه الفندق هنا ورا المطار لو نروح مشي وصلنا في ربع ساعه قال ياباشا مفيش طريق الطريق لازم ناخذ لفة المهم من هنا وهنا اخذ 70 او 60 جنيه ماني متذكر وبس خمس دقايق الا احنا في الفندق قهرني مره على الفلوس اللي اخذها حسبي الله عليه بس يلا رزقه .. المهم دخلنا فندقنا الرائع لكن للأسف تفاجأنا ان غرفتنا بعيدة عن المسابح مشوار ومعظم فنادق شرم واغلبها تتبع نظام الغرف اللي على مساحات مسطحة مش ادور كثير يعني بالكثير تكون دورين بس تكون على مساحات واسعة زي نظام الشاليهات لكن مشكلة غرفتنا اولا كانت مطلة على المطار وانا كنت طالب على الحديقة قالوا ايوه صح بس الحديقة ل ما زرعوها هههههه المهم كانت بعد صغيرة يادوب تشيل 3 اسرة لانهم جابوا سرير اضافي مافي سرير مع اني حاجز غرفة لثلاث اشخاص رحت للاستقبال وقلت له اني حطلع من الفندق او تغيرون الغرفة وحلفلي انه مافي غرف فاضية وانه بكرة حينقلنا على غرفة مطلة على الحديقة الحقيقية وقريبة من المسابح قلنا ننتظر ونشوف ، المهم رتبنا ملابسنا في الغرفة وطلعنا نتشعى في المطعم ومطعم رائع بصراحة وكبير وجلساته تفتح النفس وهذا الفندق معظم مرتاديه اجانب مافيه عرب شفناهم غير اخر يوم واحنا ماشين عموما احنا كنا نبغى نسهر لأن عبدالرحمن بتوصل رحلة الفجر واحنا جالسين في الفندق في جلسات بعد العشا نشرب شاي كان فيه شركة تسوي دعوات لحفلة في  "الباشا" بس مخصصة للي تيشيرت ابيض فقط وكان سعر التذكرة 100 جنيه وبياخذونا وبيرجعونا قلنا يلا بنرجع قبل ما يوصل دحمي وفعلا رحنا للحلفة والباشا بصراحة روووعه جدا مساحته كبيرة ودايما يسوون فيه حفلات وجلسنا فيه لحد الساعة 4

ورجعنا للفندق وشوي الى ابو الدحوم اتصل قال انا في المطار قلت لك اصحك تعطي التاكسي اكثر من 40 او 50 لانه مره قريب وفعلا ما قصر عطاه 30 :) وجانا وبتنا اول ليلة في غرفتنا الصغيرة.

 

اليوم الثاني : مسابح سييرا

بعد ما صحينا رحنا افطرنا في مطعم الفندق وبعد كذا مريت عالاستقبال عشان اشوف تغيير الغرفة الا وقلك خلاص جاهزة تحب تشوفها قلت ايه رحت الا وما قصر بصراحة حطنا في غرفة عائلية كبيرة ووسيعة ومطلة على الحديقة ومنها نقدر كمان نشوف المسابح المهم قلت يلا ننقل عليها ورحنا جبنا عفشنا ونقلناه والكل انبسط الحمدلله

 

غيرنا ملا بسنا ولبسنا شورتانا وقلنا يلا عالمسابح الخارجية الجو كان روعة ومناسب للسباحة ومسابح الفندق تجنن وفعلا نزلنا الثلاثة نتصور ونلعب كورة الماء ونتسبح ونتشمس ونشرب كولا وسفن ومأكولات خفيفة بيتزا وبطاطا وكذا وكل هذي فري بحكم ان حجزنا فل بورد ، واحنا عند المسابح  فيه شركة رحلات طلبنا نروح رحلة بدوية ودبابات برية مع العشا قال خلاص اوكي وكان سعر التذكرة 100 جنيه الفرد وبعد طبعا من التوصيل للمكان من الفندق والى الفندق حجزنا ورجعنا نكمل فلتنا في الفندق الين جا وقت الغداء وتغدينا وانبسطنا لحد ما جا موعد الرحلة البدوية

الدبابات والحفلة البدوية

الرابعة عصرا كان الباص في انتظارنا في الفندق للذهاب للرحلة البدوية ووصلنا هناك تقريبا بعد نص ساعة ورحنا لمكان التجمع وكل واحد اخذ الدباب اللي بيسوقه وتجهز الفريق عشان ننطلق

بصراحة الدبابات ماكانت حلوة لان مره نظامهم مره دقيق وممنوع نخرج من المسار وممنوع حد يتجاوز وممنوع نمشي بسرعه يعني مو قد كذا مافيها متعة لكن المهم في الطريق فيه محطات عبارة عن خيم بدوية يكون فيها شاهي وكذا وناس تبيع تحف الين وصلنا لمكان الحفلة البدوية وهو مكان مجهز كبير عبارة عن خيام ومسرح يسوون فيه عروض وفرقة موسيقية

وفي الاخير عشا والمكان كويس في الصحراء بين الجبال لكن مشكلته مافي دورات مياه جيدة جدا تعيسة لأبعد حد ومافيه مويه بعد وكمان العصيرات اللي يقدمونها والمويه مو باردة يعني الخدمة اقدر اقول هنا انها سيئة حتى العشا مو قد كذا ابد انا في نظري انها مجرد تغيير جو المسألة وعشان محد يقولنا ما رحتوا المكان الفلاني لانها تعتبر وحدة من سمات الرحلات البرية في شرم. المهم انتهينا من الحفلة الساعه 11 والباص مرجعنا قلنا له ياليت تودينا على نعمة باي نروح نتعشى ونكمل السهرة هناك وفعلا رحنا تعشينا في ماكدونالدز وبعدها رحنا جلسنا بكوفي اسمه فيروز بصراحة شيء رائع جدا وخدماتهم ممتازة

وحنا نتمشى في نعمة باي قلنا نشوف عروض الرحلات البحرية وحصلنا شركة واتفقنا معاها اننا نروح اليوم الثاني لرحلة بحرية وما طولنا بالكوفي عشان نروح ننام بدري لأن الساعه 8 لام نكون جاهزين الصباح

 

اليوم الثالث : الرحلة البحرية

اليوم الثالث صحينا بدري طبعا نسبت اقلكم ان اليوم هذا هو يوم العيد وقضيناه في البحر ابشركم  عموما صحينا زي ما قلت ورحنا للمطعم افطرنا وعينا من الله خير وبعدين انتظرنا الباص اللي بيعدي علينا وصلوا لنا الساعه 8 ونص وركبنا ورحنا عالمرسى وكان بعيد عنا وصلنا له تقريبا الساعه 9 ونص وكان انطلاقة اليخت الساعه 10 طبعا اعطيكم معلومات عن الرحلة البحرية ، الرحلة من الساعه 10 لحد الساعة 5 وتذكرتها بـ 120 جنيه مصري وشاملة المشروبات والغداء على اليخت احنا كمان اخذنا غطس والغطس زيادة اللي يبغى يغطس وخذنا الغطس الواحد 100 جنيه ، واليخت بشكل عام جيد مو فخم فيه افخم منه بس جيد يعني..

المهم انطلقنا في اليخت والجو كااان رائع جدا جدا ومشمس وطبعا من الضروري انه تاخذون معكم ادوات الغطس والسنوركلينق والسنوركلينق اللي هو الغطس على سطح الماء يعني للي ما يحب يغطس جوا البحر بس يطفو ويتفرج على المرجان والاسماك انا بصراحة مانزلت جلست بس اتفرج على الناس والمناظر الرائعة واجلت كل شيء للغطسة 

اليخت يوقف في البحر في 3 مواقع وكل مره ينزل 4 للغطس مع المدرب واللي حاب ينزلون سنوركلنق ينزلون ومعهم بعد مدرب في المرة الأولى محد نزل منا غطس المرة الثانية نزل عبدالرحمن وسامي والمرة اللي بعدها نزلت انا وكان الغوص بصراحة متعة لاني اول مره اتحمس وانزل كنت خايف بس راح الخوف

لكن المكان اللي نزلنا فيه مو قد كذا قالوا هذا اقل مكان فيه مناظر قلت يلا خيرها بغيرها ان شاء الله لكن كل اللي قهرني اني صورة فيديو لكن لما جاب لنا السيدي طلع مصور الخواجة اللي معايا وانا ما صورني ولا شيء لكن بعد خيرها بغيرها ان شاء الله

بصراحة الرحلة كانت متعة من جد وماصدقنا الا والوقت خلص وجت الساعة 5 ورجعنا للمرسى وحنا عطشانين قلنا مالها الا ايسكريم وبعدها جلسنا نتمشى شوي جنب المرسى كانت المناظر روعة وبعدها جانا الباص الخاص فينا ورجعونا للفندق ووصلنا تقريبا بعد المغرب

ريحنا شوي في الفندق وغيرنا ملابسنا وتعشينا في الفندق وبعدها ركبنا في باص الفندق اللي يروح لنعمة باي ورحنا على هناك كالعادة نتمشى شوي في شارع نعمة باي

وحصلنا واحد يبيع تذاكر لسباقات الفورميلا قلنا ما بدهاش بكرة شباب قالوا تم التذكرة كانت بـ 90 جنيه وطبعا برضو يجون ياخذونا ويرجعنا للفندق وقلنا له موعدنا بكرة الساعة 7 بالليل لأن اليوم الثاني حجزنا من الفندق رحلة جلسنا في كوفي جديد الين اخر الليل وبعدها رجعنا للفندق

 

اليوم الرابع : اكوا بارك

صحينا كالعادة في الفندق الرائع وافطرنا وكان موعد الباص اللي بيجينا عشان نروح الاكوا بارك وموعده كان الساعة 12 وجلسنا شوي في الفندق بعد الفطور واستعدينا للذهاب للأكوا بارك والأكوا بارك هي عبارة عن مدينة العاب مائية وهي رائعة جدا وحديثة والعابها كثيرة ومتنوعة وتذكرتها 165 جنيه وتشمل على وجبة غداء وموقعها في الهضبة خلف الف ليلة وليلة في شرم

وصلنا للأكوا بارك وكان لس مافي زحمة لاننا جايين بدري وصلنا كذا عالساعة 1 الظهر وبصراحة المكان مبهر من اول طلة ، طبعا يمكن صعب كثير اوصفلكم هيا بس عموما فيها العاب مائية كثيرة ومطاعمها بصراحة مش كثير قليلة جدا يمكن هذي من عيوبها

المهم خلصنا عالمغرب من اكوا بارك وانتظرنا الباص تأخر علينا ولما وصلنا كذا بعد المغرب مشينا على الفندق وغيرنا وتعشينا في الفندق وجلسنا في اللوبي في انتظار الباص اللي راح ياخذنا لسباق الفورميلا وبصراحة سامي كان أكثر واحد يقولونا خلينا نروحها انا ما كنت متحمس بس التجربة حلوة

 

سباقات الفورميلا1

عالساعة كذا 7 ونص المسا وصل الباص واخذنا على مكان حلبة السباق وكانت قريبة من الهضبة يعني ومو بعيدة عن اكوا بارك وطبعا في حلبات كثير غير اللي رحناه وفيه افخم بس بحكم اننا ما نعرف وهذي اللي كان سعرها مناسب فرحنا لها وزي ما قلت سعر التذكرة الوحدة كان بـ 90 جنيه وكمان دفعنا 75 جنيه للي جالس يصورنا

عموما دخلنا للمكان وانتظرنا دورنا يجي وممكن لو حبيت تدخل مع ناس ثانين بس احنا قلنا لا نبغى احنا الثلاثة بس نتسابق قالوا اوكي انتظروا نص ساعه والله جلسنا نفترج وعلى بال ما غيرنا ملا بسنا وعطونا الملابس الخاصة بالسباق ولبسونا الخوذة ويلا كل واحد اخذ سيارته وانطلق السباق

بصراحة كانت قمة في المتعة وكان ودنا ناخذ لفات زيادة بس لازم ننتظر دور جديد لان ما قلنا من الأول لكنها فعلا متعة وابشركم انا اللي فزت في السباق وسامي صار له 3 حوادث بس الحمدلله سلم J ومع كذا تأخر هو كثير والا لو انه استمر وساق زي الأوادم والناس كان ياخذ الأول بجدارة لانه كان سابقنا بكثير ودحمون اخذ الأخير بكل تقدير واحترام

بعد ما خلصنا السباق كانت الساعة تشير تقريبا للعاشرة وجا باصنا وين ياسيدي قلنا نزلنا على طريقك في نعمة باي تعرفون هذي آخر ليلة من غير شر لنا في شرم فخلينا نسهر هنا مع الخلق والناس

والله فعلا نزلنا في نعمة باي ورحنا لكوفي ومطعم جلسنا تعشينا فيه مشويات وهو مطعم لبناني وكان الجو بارد جدا وبعد ما خلصنا اخذنا لفة في نعمة باي وجينا راجعين للفندق

 

اليوم الخامس : فندق سافوي سييرا

اليوم هذا هو يوم العودة وانتهاء رحلة قليلة الأيام كثيرة الموائد.. عبدالرحمن كانت رحلته الساعة 11 الظهر يرجع من شرم الشيخ لجدة اما احنا فكانت رحلتنا الساعة 6 المسا راجعين عالقاهرة ، صحينا الصباح وطبعا لحكم ان الوقت كان ضيق ما ينفع اننا نروح لأماكن كثير فصحينا ورتبنا ملابسنا وغرفتنا ورحنا افطرنا في مطعم الفندق

وبعدها وودعنا عبدالرحمن وراح للمطار وحنا رجعنا جلسنا شوي في المسابح وتمسنا بعد كذا قلنا ناخذ لفة على المنتجع وسافوي فيه فندقين بجوار بعض واحد اسمه سافوي وهذا مطل مباشرة على البحر وخلفة يجي الفندق سافوي سييرا  ومساحة المنتجعين كبيرة وفيه بينها شارع داخلي فيه كفيهات ومطاعم ومحال العاب ومركز تسوق وجدا رايق وأجمل مافيها كمان المسجسمات الرائعة الموجودة في ارجاء الفندق كامل

اخذنا لفة على البيتش الخاص فينا او في فندق سافوي الرئيسي بس الجو كان بارد والا كنا بنشوف لو اخذنا المنطاد او أي العاب مائية لكن اجلناها لسفرة قادمة ان شاء الله ، الشيء الرائع ان الساحة اللي بين الفندقين هذي كانوا يرتبون لاقامة حفلة غنائية طبعا بمناسبة مرور مدري كم سنة على منتجع سييرا طبعا الحفل كان بيبتدي الساعة 8 بالليل واحنا وقتها ان شاء الله بنكون فالقاهرة والدخول مجاني لكل نزلاء الفندق والحفلة كانت لكارول سماحة ونسيت مين معاها كمان المهم واحنا نتمشى في الساحة كانوا يجهزون وكمان هيا كانت موجودة تعمل بروفات الحفلة فلقطنلاها كم صورة وتصوير فيديو مقلوب تحصلونه في الالبوم

المهم بعد كذا في ملعب ميني قولف في الفندق قلنا يلا نلعب يلا نلعب واول مره امسك مضرب القولف بس اشرايكم تقولوا محترف سعودي

بعد كذا رحنا سلمنا غرفتنا وتغدينا في الفندق واتجهنا للمطار وهالمرة دفعنا 30 جنيه للتاكسي وحنا رايحين

 

هذي رحلتنا بشكل عام واحب اعطيكم بعض الملاحظات للي حاب يسافر شرم الشيخ

-          دائما حاول تاخذ فنادق مخرجها يطل مباشرة على شوارع عامة لان مش من السهولة تحصل تكسي يدخل لمنطقة منتجع معين وفندق سافوي سيرا افضل في هذى الناحية من سافوي لانه مطل على الشارع انما سافوي له مدخل جانبي ولأن اسعار التكاسي غالية فيغلون زيادة على اللي عارفين انه ما راح يحصل تكسي ، الشيء الثاني وهذا دلنا عليه واحد الله يرزقه بالجنة قال وانتوا راجعين دايما من نعمة باي تحصلون باصات لونها كحلي ياخذ الفرد بثلاثة جنيه بدل ما تدفعون مبالغ كبيرة على التاكسي انتوا قلوله بس فندق سيرا وهو يجيبكم طبعا في ناس معانا وهذا الباص زي الميكروباصات حقت القاهرة بس هذي انظف بكثير وفعلا اذا صادفة رجعتنا ماكان فيه باصات خاصة بالفندق لان الفندق له باصات بتروح وتجي لنعمة باي وكل الفنادق كذا بس بعض الاحيان او اكثرها ما تكون المواعيد تناسبك خاصة بالليل انها ترجع اخر رحلة الساعة 11 وبالتالي ماعندك خيارات الا التاكسي واقل تاكسي بيقبل يوديك مثلا لسيرا ف30 جنيه لو حصلت

-          يفضل انك تبحث عن فنادق تقدم لك اقامة كاملة هذا راح يخليك ترتاح اكثر

-          المكاسرة في السعر لا بد منه في شرم سواء مع التكاسي او اصحاب الرحلات السياحية ولا تقلق في المكاسرة لانه اذا هو مش ماخذ الضعف مش قليل

-          دائما حاول تاخذ سعر للمجموعة لانه بيكون سعرك اقل

-          اختر اوقات تكون الاجواء فيها معتدلة الى حارة والافضل تكون معتدلة قليلة الحرارة

-          لا تنسى دائما تشتري ادوات السنوركلينق وملابس السباحة والافضل تجيبها معاك من برا شرم

 

وأخيرا لكم مني أحلى حلى "كاسترد بالكارميل" ولا تنسوا تشوفوا البوم الصور في صور كثير عن الرحلة