مساء الجمال للكل .. سبق و حكيت لكم أنو يوم الأحد 21 فبراير يوم مميز .. و الحين راح انثر لكم تميزه هنا ..

يومها طل البدر على جده و أضاء سماءها بشكل مختلف تماما ..

كانت ليلة و لا كل الليلالي بجامعة عفت التي أستضافت بدر بن عبدالمحسن ليترك لهم بصمة جمال يواصلوا فيها مسيرتهم ..

كان يوم مختلف تماما .. وصلنا لمقر الأمسية الساعة 8:30 تماماً .. كان دخول النساء من بوابة و الرجال من بوابه أخرى بعيدة .. مما ساعد على عدم تواجد أي زحمة .. دخلنا للبوابه و كان أستقبالهم مرتب و منظم تم الختم على التذاكر و و توجيهنا للمقاعد المخصصه و ضيافتنا بالقهوة و التمر المحشي و الشوكلاته ..

و كان الجزء السلفي من القاعه طبعاً للرجال و الجزء العلوي للنساء .. و يفصل بينهم الممر للمدخلين ..

كانت الأمسية من تقديم الإعلامي علي العلياني و كان تقديمه جداً مميزا ، بدأه بالسلام الملكي و قف له جيمع من بالقاعة .. تلى ذلك دخول البدر و بدأ الأستاذ علي بتقديمه و بعدها ترك الكلام للبدر حيث لا حضور للكلمات في حضورة ..

بدأ حديثة البدر عن مؤسسة الجامعه الأميرة عفت و عن مواقفه معها .. ثم أستأذن الحضور أن يبدأ أمسيته بقصيدة للوطن .. و بعدها بثلاث قصائد لأقرب ثلاث نساء لهن الأثر الكبير في حياته.. و هن ..

- وضحى الحمود - والدته
- سلمى الرشيد - جدته
- عفت الثنيان - زوجة الملك فيصل

بعدها بدأ بالقصائد المغاناه و كانت أول قصائده * المزهرية ..

*لاإنتي وردة .. ولا قلبي مزهرية من خزف
صدفه وحده جمعتنّا .. شوفي وشلون الصدف
التقينا في مدينه .. وفرقتنا الف ميناء
اغفري للريح .. والموج .. والسفينة
كانت الرحلة حزينة .. للاسف
كنت أحلم لما ناديتك بسافر
مع عيونك في شعاع الفجر باكر
والله اعلم إني صادق
كنت أحلم إني عاشق
لاأخاف ولا أضيع .. ولاأفارق
ويش اقول غير إني آسف ويش اقول
انا خانتني العواصف والفصول
آه .. ياتعب المسافر
في أراضي الجرح و في بحر المحاجر
مالهذا الحزن آخر .. او لهذا الجرح آخر
ياشمسي الأخيرة .. في اللحظة الأخيرة
أنا .. لي كلمة أخيرة
إغفري لي إبتسامي .. قبل جرحي
حاولي تنسي كلامي .. قبل صمتي
ولو زعلتي .. ياأعز الناس إنتي ..

ليحلق بنا بعدها لسماء آخر بـ * جمرة غضى ..

بعدها أخذ فترة إستراحه من الشعر و أتاح الفرصة للجمهور و تساؤلاته  و ليحكي لنا عن بعض المواقف الطريفة له و إلي يقول منها كنا موقفيين بالشارع ع اساس بيمر موكب الملك فيصل  ..
هالحكي وحنا صغار وانا واخوي مرتزين بالمرتبه الي قدام ،
ويوم مر الملك فيصل لمحنا ويوم وصل قصره شاف ابوي بانتظاره ..
قال تصدق يا عبدالمحسن انك ماورثت لعيالك الا هالنظارات غاادين تقل عصافير بهن ..

و بعدها بدأت التساؤلات بسؤال من محمد العبدالله الفيصل و تلى ذلك سؤال من الجمهور و سؤال للفنان الأستاذ عبادي الجوهر الذي فاجأ وجوده البدر و أسعده جداً ليهمس للجمهور بعد إجابته على عبادي "عبادي من البقيه الباااقيه القليله جداً الي يغني للفن .. مااا يغني لـ تجارته "

و أوصل الجمهور طلباته للبدر لينتشي فرحاً أكثر و يقول مبتسماً أنا دايم يطلبون مني قصايد مشهورة مثل ليلة لو باقي ليلة وغيرها ، لكن ماقد شفت جمهور يطلب القصايد الي احبها والي قريبه لقلبي مثل جمهوري بجدة خاصة وجمهوري  بالسعودية عامة ..

بعدها عاد لأجواء الشعر و التحليق .. ليحلق بنا هذه المرة لسماء سابعه بقصيدة * لكل قصة حب ...

*في كل قصة حب..
أحلام ومدينه..
ليل ونخيل وهبوب..
لكل قصة حب لو كانت حزينة..
أجمل ألوان الغروب..
ناظري ضي الحوانيت القديمة..
ونقش أبواب البيوت..
كلها شعر ومواعيد قديمه
وصوت قلبي اللي يموت..وما يموت..
لكل قصة حب عذال وحسود..
ليه تخدعنا الأماني ؟؟
والليالي السود..سود..
أشعلي جمر العناد..قربي ..معاد أشوفك!!
لا يفرقنا السواد..
ارسمي وجهي بكفوفك..
ولا تجرحنا عيون الليل..وحروف النميمة..
ولا يعذبنا السكوت
إن عطشنا وان شربنا الدمع ديمه..
للهوى بنحيا ونموت
لكل قصة حب أشواك وورود..
وليه نصرخ من ألمها وكلها تنبت في عود..
ناظري..هذا قمرنا لو تغطيه الغيوم..
وناظري..هذا شجرنا ومهما تحرقه السموم..
ولو تجرحنا عيون الليل وحروف النميمة..
ولو يعذبنا السكوت..

إن عطشنا أو شربنا الدمع ديمه...
للهوى بنحيا ونموت ..

ليحملنا بعدها على غيمةٍ وردية .. بقصيدة *إنتِ عيونك ..

*إنتى عيونك والعتيم سبحان رب خالقه ..
قصيدة لشاعر قديم عاشق وماحد صدقه..
ومن كثر ما غبتي عليه جمع قصيدة وشققه..
إنتى عيونك سالفه سمعتها ليلة سفر ..
واثنين مروا بعاصفه وضيعوا نجمة وقمر..
ومن يومها كثر الظلام وراح السحاب وبارقه..
إنتي عيونك هالمدى بحر وطيور مهاجرة..
تركت في شطه صدى صوت تجرح آخره..
ليتك سمعتي صرختي بالحيل كانت صادقه..
إنتى عيونك نجمتين ضي ورا ضي يعود..
ويادوب غابوا ليلتين خلو شموس الكون سود..
رحتي ولا ظنك تجين ..
وين الوعد يامفارقه..
إنتى عيونك والعتيم سبحان رب خالقه..
قصيدة لشاعر قديم عاشق وماحد صدقه..
ومن كثر ما غبتي عليه جمع قصيدة وشققه ..

بعدها أستهل ف الكلام عن روايته الجديده التي سترى النور قريباً بإسم ( طوق )

ليحكي عن بعض تفاصيلها و يلقي منها نص يخُص بهِ جمهوره بجده ..

*يذكرني القمر ظلك عجب ياللي ظلالك نور..
انا اللي ماعرفت الليل لولا عتمه اهدابك..
حبستك فالسماء شمس وعلى وجه السحاب طيور..
ونخيل باسق يشرب رضاك ويعطش عتابك..
وجلست اناظرك ما رف لي جفن تقل مسحور..
اقول ان الجمال انتي وكل العشق باسبابك..
هقيت اني ملكتك مادريت ان الاماني غرور..
وانك في يدي لين انتحاب الوقت واقفابك..
سقا الله يوم كان اكبر همومك خاطري المكسور..
وكنت الضي في عينك وكنت السقم في ثيابك..
سقا الله يوم كنتي الارض انهار وشجر وقصور..
ديار نورها من طاقتك واحلامها بابك..
عيوني ياشقى عيوني من الجذب الموات البور..
اراضي مابها الا ماذوى وانهد في غيابك..
احبك كان لي قلب يجض من الجفا مقهور..
وصار اليوم يفرح لو لقى به عذر يلقابك..

و يحلق بنا بعدها بكم نص آخر ليختم الأمسية بقصيدة * المسافر و كأنه يودعنا با ..

*لا تلوح للمسافر
المسافر راح
ولا تنادي المسافر
المسافر راح
يا ضياع أصواتنا في المدى والريح
القطار وفاتنا
والمسافر راح

يالله يا قلبي تعبنا من الوقوف
ما بقى بالليل نجمة ولا طيوف
ذبلت أنوار الشوارع وإنطفى ضيّ الحروف
يالله يا قلبي سرينا ضاقت الدنيا علينا
القطار وفاتنا
والمسافر راح

مادري باكر هالمدينة وشتكون
النهار والورد الأصفر والغصون
هذا وجهك يالمسافر لما كانت لي عيون
وينها عيوني حبيبي
سافرت مثلك حبيبي
القطار وفاتنا
والمسافر راح

بعدها تم ختم الأمسية و تقديم درع تذكاري للأمير البدر .. و كانت ليلة و لا كل الليالي ..

*كثر ما كنت مستانسه بحضوري للبدر كثر ما كنت متحسفه على عدم وجود شخص قريب لروحي معاي بهالأمسية ، لكن إلي هونها علي أنه كان موجود معاي بإحساسي و بكل كلمة قالها البدر ..

أعتذر عن الإطالة وعسى أكون قدمت شيء يليق فيكم ..

*ملاحظة / الصور من تصوير الأخت اتعبني غروري عضوة من منتديات الإقلاع .